कृष्ण जन्माष्टमी पऽ – ‘अवध में राम आइलें, बिरज में कान्हा के तैयारी’ गीत भइल वायरल
जन्माष्टमी 2025: ‘बिरज में कान्हा के तैयारी’… म्यूजिक वीडियो पऽ लोगन के मिल रहल बा खूब प्यार।
जन्माष्टमी के तैयारी जोर-शोर से चल रहल बा। मंदिरन के सजावल गइल बा। बाजार आ मेला भी सगरी रंगीन हो गइल बा। ए मौका पर श्रीकृष्ण भजन खूब गुनाइल जा रहल बा।
एही बीच हिंदी-भोजपुरी के प्रसिद्ध गीतकार मनोज भावुक के गीत ‘अवध में राम आइलें, बिरज में कान्हा के तैयारी’ के म्यूजिक वीडियो दर्शक लोग के दिल जीत रहल बा। ई गीत भोजपुरी आईटी सेल नामक यूट्यूब चैनल पर रिलीज भइल बा। एह गाना के आवाज सुरभि कश्यप, कुणाल मिश्रा आ साकेत सुमन दिहलें। गाना के शूटिंग गायक लोग समेत निर्माता शैलेन्द्र द्विवेदी पर भइल बा। संगीत मोहित म्यूजिक आ साकेत सुमन बनवलें। गीत के कॉन्सेप्ट आस्था द्विवेदी के आ निर्देशन दिग्विजय सिंह के बा।
गीत के बारे में मनोज भावुक आपन फेसबुक वॉल पऽ लिखलन –
“राम- कृष्ण हमार नायक हवन, महानायक हवन। ऊ हमनी के धड़कन आ लय में बसल बाड़न। उके भूलाईं त हम बेसुरा आ बीमार हो जाईल। बाकिर उके गुनलीं, गाइलीं, सुनलीं त सुख, शांति आ आनंद मिलेला। जब मन में राम उतरले आ कान्हा के बांसुरी बाजल त रचना निकले लागल। ओही रचनन में से एगो के भोजपुरी आईटी आ ओकर प्रमुख शैलेन्द्र द्विवेदी जी आपन अद्भुत प्रस्तुति से सजवले बाड़न आ ई गीत कृष्ण जन्माष्टमी पर समर्पित बा। सुनल जाव, सुनावल जाव आ राम-कृष्ण के मन में बसावल जाव। ई गीत अंतिम आदमी तक पहुँचे के चाहीं। राम-कृष्ण सबके हवन।”
भोजपुरी आईटी सेल भोजपुरी में साफ-सुथर कंटेंट बनावे खातिर प्रतिबद्ध बा। एहके संचालक शैलेन्द्र द्विवेदी सिंगापुर में सॉफ्टवेयर इंजीनियर हवन। जबकि गीतकार मनोज भावुक, अफ्रीका आ यूरोप में करीब दस बरिस इंजीनियरिंग सेवा देके अब पूरा समर्पण से भोजपुरी खातिर काम करत बाड़न।
अनेक किताबन के लेखक आ फिल्म गीतकार मनोज भावुक कहेलन –
“मनोरंजन खातिर बच्चा लोग भले सलमान-शाहरुख के देखे, बाकिर असली नायक त राम आ कृष्ण हवन। हर बच्चा के ऊ लोग के ठीक से जानल आ आपन जीवन में उतारल जरूरी बा। राम आ कृष्ण के जीवन, मानव जीवन के सभ समस्या के समाधान ह। ई गीत कृष्ण जन्माष्टमी पऽ दर्शक लोग खातिर एगो अनुपम भेंट ह।”
0 Comments