DPIAF कोलकाता 2026: तीरथ सिंह रावत आ अशोक किर्तनिया संजय भूषण पटियाला के कइलें सम्मानित
कोलकाता, 19 सितंबर 2026: कोलकाता के नेशनल लाइब्रेरी ऑडिटोरियम, अलीपुर में आयोजित एगो भव्य समारोह में बॉलीवुड आ भोजपुरी सिनेमा के चर्चित फिल्म प्रचारक आ फिल्म प्रोड्यूसर संजय भूषण पटियाला के प्रतिष्ठित दादा साहब फाल्के आइकन अवार्ड फिल्म्स कोलकाता 2026 से सम्मानित कइल गइल।
ई सम्मान उत्तराखंड के पूर्व मुख्यमंत्री आ वरिष्ठ भाजपा नेता तीरथ सिंह रावत आ पश्चिम बंगाल सरकार के खाद्य एवं आपूर्ति मंत्री अशोक किर्तनिया के ओर से प्रदान कइल गइल। कार्यक्रम के आयोजन DPIAF – दादा साहब फाल्के आइकन अवार्ड फिल्म्स ऑर्गेनाइजेशन (एनजीओ) के फाउंडर चेयरमैन कल्याणजी जाना द्वारा “Celebrating Cinema | Culture | Tourism” थीम पर कइल गइल रहे।
एह अवसर पर पूर्व मुख्यमंत्री तीरथ सिंह रावत कहलें, “संजय भूषण पटियाला भोजपुरी आ बॉलीवुड सिनेमा के प्रचार-प्रसार खातिर जवन मेहनत कइले बाड़ें, ऊ बेहद सराहनीय बा। एह सम्मान खातिर हम उनका के दिल से बधाई देत बानी। हमार शुभकामना बा कि रउआ आगे बढ़ीं, अउरी बड़ सफलता हासिल करीं आ देश के नाम रोशन करीं। अइसने युवा लोग हमनी के सिनेमा आ संस्कृति के आगे ले जइहें।”
पश्चिम बंगाल के मंत्री अशोक किर्तनिया कहलें, “कोलकाता के एह धरती पर संजय जइसन मेहनती फिल्म प्रोड्यूसर आ प्रचारक के सम्मानित क के हमनी के बहुत खुशी हो रहल बा। बंगाल हमेशा से कला आ सिनेमा के एगो प्रमुख केंद्र रहल बा। संजय के काम सराहनीय बा आ हमनी के चाहत बानी कि ऊ बंगाल आ भोजपुरी सिनेमा के साथ लेके अउरी बड़ काम करीं।”
सम्मान मिलला के बाद संजय भूषण पटियाला कहलें, “हम DPIAF, कल्याणजी जाना, पूर्व मुख्यमंत्री तीरथ सिंह रावत आ मंत्री अशोक किर्तनिया के हृदय से आभार व्यक्त करत बानी। ई अवार्ड खाली हमार ना, बलुक पूरा भोजपुरी आ बॉलीवुड फिल्म इंडस्ट्री के सम्मान बा। हम कई बरिस से फिल्म प्रचार आ निर्माण से जुड़ल बानी आ ई अवार्ड हमार जिम्मेदारी के अउरी बढ़ा देत बा। हम वादा करत बानी कि अच्छी आ संस्कारी फिल्म बनावल जारी रखब आ देश आ आपन माटी के नाम रोशन करब।”
बतावल जाव कि संजय भूषण पटियाला अब तक करीब 1200 फिल्म के प्रचार-प्रसार से जुड़ल रहल बाड़ें। एकरा अलावा ऊ कई गो फिल्म आ वीडियो एल्बम के निर्माण आ निर्देशन भी कइले बाड़ें। मूल रूप से प्रयागराज, उत्तर प्रदेश के निवासी संजय भूषण पटियाला सामाजिक कार्य से भी जुड़ल बाड़ें। ऊ भूषण फैमिली फाउंडेशन के फाउंडर हउवें, जवन देश के अलग-अलग राज्य में सामाजिक काम लगातार करत आ रहल बा।
संजय भूषण पटियाला मनोज तिवारी, रवि किशन, पवन सिंह, खेसारी लाल यादव, पाखी हेगड़े आ रानी चटर्जी जइसन भोजपुरी सिनेमा के चर्चित सितारन के फिल्म से जुड़ल रहल बाड़ें।
0 Comments