गोरखपुर : पिपली वन महोत्सव के रूप में मनावल गइल सम्राट अशोक जयंती, गोरखपुर में भइल भव्य आयोजन।
चौरीचौरा क्षेत्र के डुमरी खुर्द स्थित एगो मैरिज लॉन में बुध(25-March-2025) के दिन अखंड भारत के निर्माता मानल जाए वाला चक्रवर्ती सम्राट अशोक महान के जयंती पिपली वन महोत्सव के रूप में धूमधाम से मनावल गइल। कार्यक्रम में क्षेत्र के कई गणमान्य लोग आ समाजसेवी शामिल भइले।
कार्यक्रम के शुरुआत भव्य शोभायात्रा से भइल, जवन पिपली वन रजी बाजार में स्थित सम्राट अशोक के प्रतिमा पर माल्यार्पण क के संपन्न भइल। एह दौरान आयोजक श्रवण कुमार मौर्य बतवलें कि सम्राट अशोक के शासनकाल भारत के गौरवशाली इतिहास के प्रतीक बा। ऊ अखंड भारत के स्थापना क के देश के एकजुट करे में महत्वपूर्ण भूमिका निभवले रहन।
ओह लोग बतवलस कि सम्राट अशोक के शासनकाल में भारत के “सोने के चिड़िया” कहल जात रहे। मौर्य वंश के तीसरा शासक के रूप में ऊ अपना दादा चंद्रगुप्त मौर्य के विरासत के आगे बढ़वले आ देश के मजबूत बनवले।
कार्यक्रम में संविधान निर्माता डॉ. भीमराव अंबेडकर के विचारन के भी याद कइल गइल, जवन सम्राट अशोक के आदर्श से प्रेरित रहले। एह मौका पर लोक गायिका कोमल मौर्य गीत के माध्यम से महान विभूतियन के इतिहास के जीवंत क दिहली।
कार्यक्रम के संचालन योगेंद्र मौर्य कइलन। आयोजन के सफल बनावे में ग्राम प्रधान विष्णु मौर्य, सुशील मौर्य, संदीप मौर्य, सुनील मौर्य, इंद्रपाल मौर्य, परशुराम गुप्ता, ब्रजेश मौर्य आ राहुल मौर्य समेत कई लोग के महत्वपूर्ण योगदान रहल।
एह तरह के आयोजन ना सिर्फ इतिहास के जिंदा रखेला, बल्कि नई पीढ़ी के प्रेरित करे के काम भी करेला। पिपली वन महोत्सव के रूप में मनावल गइल ई आयोजन क्षेत्र में खास चर्चा के विषय बन गइल बा।
0 Comments