गोरखपुर : सांसद रवि किशन जी के भोपाल के यूनिवर्सिटी में मिलल डॉक्टरेट के मानद उपाधि।
मध्यप्रदेश के राजधानी भोपाल में स्थित एलएनसीटी यूनिवर्सिटी में आयोजित पंचम दीक्षांत समारोह बड़ा ही गरिमामय माहौल में संपन्न भइल। एह अवसर पर रवि किशन, जे कि गोरखपुर से सांसद हउवें, उहाँ के डॉक्टरेट के मानद उपाधि से सम्मानित कइल गइल।
ई सम्मान मध्यप्रदेश के महामहिम राज्यपाल मंगूभाई पटेल के हाथे प्रदान कइल गइल। समारोह में शिक्षा, स्वास्थ्य आ सामाजिक क्षेत्र से जुड़ल कई गणमान्य लोगन के उपस्थिति रहल, जेकरा से कार्यक्रम अउरी खास बन गइल।
सम्मान मिलला के बाद सांसद रवि किशन अपना संबोधन में कहनी कि ई उपाधि उनकरा खातिर गर्व के साथ-साथ एगो बड़ी जिम्मेदारी भी ह। ऊ कहलन कि ई सम्मान उनकरा के आपन कर्तव्य के प्रति अउरी अधिक निष्ठा आ समर्पण से काम करे के प्रेरणा देत बा।
रवि किशन आगे कहनी कि जनसेवा ही उनकर सबसे बड़ा लक्ष्य बा। ऊ समाज, प्रदेश आ देश के भलाई खातिर लगातार काम करत रहीहें। समारोह में उनकर ई विचार सुन के उपस्थित लोगन में काफी उत्साह आ सराहना देखे के मिलल।
ई कार्यक्रम ना खाली शिक्षा के महत्व के उजागर कइलस, बल्कि समाज सेवा में योगदान देवे वाला व्यक्तित्व के सम्मानित करे के एगो मिसाल भी पेश कइलस।
0 Comments