बलिया : बाबा धाम शुभनथही में अति महारुद्र यज्ञ के आयोजन, आज भइल कलश यात्रा।

जिला के बैरिया क्षेत्र में परमपूज्य संत ब्रह्मलीन पशुपतिनाथ बाबा के जन्मभूमि बाबा धाम शुभनथही में अतिरुद्र महा यज्ञ के आयोजन कईल गईल बा। सोमार के गाजा बाजा के साथ निकलल कलश यात्रा में सबसे आगे संत महात्मा रथ पर बइठके चलत रहल लोग। उनकरा पीछे हाथ मे कलस लहले रंग बिरंगा कपड़ा में स्त्री पुरूष अउरी युवा लोगन के टोली चलत रहल। बाबा धाम से निकलल कलश यात्रा में शामिल लोग हरहर महादेव के जयघोष करत रहले। बड़ संख्या में बाइक सवार युवकन के टीम भी कलस यात्रा में शमिल भइल।

श्रद्धालु लोग सती घाट गंगा तट पर जाके सबसे पहिले गंगा स्नान कईल लोग ओकरा बाद कलश में गंगा जल भरकर पुनः बाबा धाम शुभनथही यज्ञ मंडप में गंगा जल लेके पहुंचल लोग। बाबा धाम के व्यवस्थापक ध्रुव जी ने बतावले कि अतिरुद्र महा यज्ञ एक मार्च से शुरू होके 11 मार्च तक चली। 12 मार्च के वृहद भंडारा के साथ यज्ञ के समापन होई। यज्ञ के मुख्य आचार्य जानल मानल संस्कृत विद्वान पंडित नरेंद्र नाथ पांडेय अउरी बुद्धि सागर मिश्रा जी बा लोग। यज्ञ में परम पूज्य संत श्री नारद बाबा अउरी विनय ब्रह्मचारी जी महाराज भी रही लोग मौजूद।

एह कलश यात्रा में मुख्यरुप से श्री नारद बाबा, ध्रुव जी, तारकेश्वर मिश्र, अंगद मिश्रा फौजी, आदित्य मिश्रा गोलू, गंगाराम चौबे, अशोक मिश्र, सुरेश सिंह आदि सैकड़न के संख्या में श्रद्धालु लोग रहल।